08-01-2007, 10:27 PM
In nomine Patris, et Filii, et Spiritus Sancti. Amen
In manus tuas, Domine, commendo spiritum meum.
Domine Iesu Christe, suscipe spiritum meum.
Sancta Maria, ora pro me.
Maria, mater gratiae, mater misericordiae, tu me ab hoste protege, et hora mortis suscipe.
Sancte Ioseph, ora pro me.
Sancte Ioseph, cum Virgine Sponsa tua, aperi mihi divinae misericordiae sinum.
Iesu, Maria, Ioseph, vobis cor et animam meam dono.
Iesu, Maria, Ioseph, adstate mihi in extremo agone.
Iesu, Maria, Ioseph, in pace vobiscum dormiam et requiescam.
R. Subvenite, Sancti Dei, occurrite, Angeli Domini, * Suscipientes animam eius, * Offerentes eam in conspectu Altissimi.
V. Suscipiat te Christus, qui vocavit te, et in sinum Abrahae Angeli deducant te.
R. Suscipientes animam eius, * Offerentes eam in conspectu Altissimi.
V. Requiem aeternam dona ei, Domine: et lux perpetua luceat ei. Offerentes eam in conspectu Altissimi.
Kyrie, eleison.
Christe, eleison.
Kyrie, eleison.
Pater noster... (in secreto usque ad
V. Et ne nos inducas in tentationem. R. Sed libera nos a malo.
V. Requiem aeternam dona ei, Domine. R. Et lux perpetua luceat ei.
V. A porta inferi. R. Erue, Domine, animam eius.
V. Requiescat in pace. R. Amen.
V. Domine, exaudi orationem meam. R. Et clamor meus ad te veniat.
V. Dominus vobiscum. R. Et cum spiritu tuo.
Oratio:
Oremus. Tibi, Domine, commendamus animam famuli tui ut defunctus saeculo, tibi vivat, et, quae per fragilitatem humanae conversationis peccata commisit, tu venia misericordissimae pietatis absterge. Per Christum Dominum nostrum. R. Amen.
Si defunctus fuerit sacerdos, post nomen proprium addatur vox sacerdotis.
Oratio:
Proficiscere, anima christiani, de hoc mundo, in nomine Dei Patris omnipotentis, qui te creavit: in nomine Iesu Christi, Filii Dei vivi, qui pro te passus est: in nomine Spiritus Sancti, qui in te effusus est: in nomine gloriosae et sanctae Dei Genetricis Virginis Mariae: in nomine beati Ioseph, inclyti eiusdem Virginis Sponsi: in nomine Angelorum et Archangelorum: in nomine Thronorum et Dominationum: in nomine Principatuum et Potestatum: in nomine Virtutum, Cherubim et Seraphim: in nomine Patriarcharum et Prophetarum: in nomine sanctorum Apostolorum et Evangelistarum: in nomine sanctorum Martyrum et Confessorum: in nomine sanctorum Monachorum et Eremitarum: in nomine sanctarum Virginum, et omnium Sanctorum et Sanctarum Dei. Hodie sit in pace locus tuus, et habitatio tua in sancta Sion. Per eundem Christum Dominum nostrum. R. Amen.
REQUIEM aeternam dona eis, Domine, et lux perpetua luceat eis. Requiesant in pace. Amen.